Nouruz Başü
Bayram ki bü, 'id ki ama,
Həmə əyəlun şar ibaşü,
Bə bağ, bağçə be gəştən murand,
Dül kələha dahar ibaşü,
Dəst-ru xiştənunə mişürund,
Midəgirund tazə ələt,
Şari misand, vazi misand,
Əzəlşunü rışinə həyat.
Təbrik misand may, piyərə,
Birar, xuvar maç misanund,
Amu, dayi, xalə. əmə,
Bədirəni quc misanund.
Əyəlunə arzuyürü - hər sal
Nouruz çən ruz başü.
Cibmu pur ə nuğul, nabat,
Hər ruzmu 'idə ruz başü.
Duxtərmə
Dxutərməni, nazməni,
Nəğməməni,sazməni.
Ruztü başü pur ə gül,
Ömür seyi şar, məngü.
Şirinə xoha vini,
Bə xotü gül vəçini.
Hiç nə dani hiylə, fənd,
Ratü başü şəkər, qənd.
Bə maytü tü gül tiyi,
Yə dəstə sümbül tiyi.
Ürdəkməni, qazməni,
Tü xuşə avazməni.
Tü histi-ruz cənnətü,
Duhun mənə ləzzətü,
Tü dülməni, cunməni,
Bə damarmə xunməni.
Tü noqulmə, nabatmə,
Tü arzumə, həyatmə.
Hər gaftü bemən canü,
Xəndətü yə cahanü.
Ələti rangbərangü,
Duxtərmə çü qəşəngü!
Ruz təvəllüd
Bə şeş sal nə rasiram,
Bə suxtən şeş çıraqmən,
Rıp-rışinü utaqmə,
Piyərmə tüfəng xıre,
Maymə yə top astare,
Birarmə yə tapancə,
Xaləmə güfte xunçə,
Xuvarmə xıre ələt,
Cibmə pır ə işqalat,
Turt birjunde nənəmə,
Gül zəre bə yexəmə,
Dəgüft imruz babayme,
Taza çəkmə bə paymə,
Dustayməniş amarand
Xeyli bəxşə avardand,
Amumə qey bire şar
Əngəst mənə bə biyar,
Ə Dağustun amare,
Bə mən vertelyut dəre,
Ə puştulyun astaram
çənta güllü tiliqram,
Həmməyi təbrik bətən,
ki, kələmərd başüm mən ..
Dust darüm
Əz mə dur mara duxtər,
Mən bə tü dustüm, yarüm,
Hə ə duriş başü, dan,
Ə dirənqu qey şarüm.
Rutu vərfü-supsubi
Muhaytü ipək hamar
Dül bə suxtən, mətin tü,
Qulac muytürə bə var.
Biyə ki beki xəndim,
Xəndə tü bəmənü qənd,
Gərdən mənə qucaq sən,
Bə dü dəsaz şun kəmənd.
Be bə cunmə cun dərən,
Dəsmənə gi bə dəstü,
Dülmə ə pur o başü,
Can gürü ə nəfəstü.
Tə bə axır ümürmə
Türə bistən dust darüm,
Biya səhəb dülmə baş,
Ə dərdtü mən bezarüm.
Ə duxtər, duxtər, tü kisti?
Mənə diri xəndisti,
Mara məgu bə maytü,
Biya bura bə otü.
Mən türə dirüm,
Aşiqtü birüm,
Əgər tü bə mə nəyeyi,
Mən ə dərd tü immürüm
Tatə xalq quşmayi
Raftüm dirüm bə bun Qazi dütə siçan bə vazi,
Şundüm sanqə nə rasi,
Dov-dov səxtüm vaçaristüm bu vinimə xunin,
Xunə dərüm bə xari,
Xari bə mən giyov da,
Giyoyə dərüm bə Qusband,
Qusband bə mə dümbə da,
Dümbə rə dərüm bə qəri,
Qəri bə mə qaqal da,
Qaqalə dərüm bə malla,
Malla bə mə kitab da,
Kitabə dərüm bə Xuda,
Xuda bə mən ömür da.
Tatə xalq quşmayi
Arkəraha beyiste,
Məmmədağa doyiste,rüm
Bə xunə xalə nə rasire,
Bə sər cilit çəmiste,
Ə qəri-qəri qənbəri,
Dərə kufte çəmbəri,
Bə çantamə nun dəkan,
Mala mund bə dundəri,
Ə gədə-gədə tü kisti,
Mənə diri xəndisti,
Yə cüft curub bə paytü,
Mara məgu bə maytü.
Tatə xalq quşmayi
Vasala Ruzha
Ey vasala ruzhayü,
Sala əziz ruzhayü,
Ou san vərfə bə dahar,
Şar başü dül ə bahar.
Arkarəha sel başü,
Dara vakanund çiçək,
Vəlghayşun ləçək-ləçək.
M.Hacıyevin tərcümələrindən
